ദയാഹര്‍ജി സ്വീകരിക്കണം.

ന്യൂഡല്‍ഹി : 1993ലെ മുംബൈ ബോംബ്സ്ഫോടനക്കേസില്‍ യാക്കൂബ് മേമന്റെ വധശിക്ഷ നടപ്പാക്കിയതുകൊണ്ട് മാത്രം നീതിനിര്‍വഹണ താല്‍പര്യങ്ങള്‍ നിറവേറ്റപ്പെടുകയില്ലെന്ന് സിപിഐ എം പൊളിറ്റ്ബ്യൂറോ പ്രസ്താവനയില്‍ പറഞ്ഞു. യാക്കൂബ് മേമന്റെ വധശിക്ഷ ജീവപര്യന്തമാക്കി മാറ്റണം. എന്നാലേ നീതി ഉറപ്പാക്കാന്‍ കഴിയൂ. രാജീവ് ഗാന്ധി വധക്കേസിലെ പ്രതികളുടെ വധശിക്ഷപോലും ജീവപര്യന്തമാക്കി മാറ്റിയിരുന്നു. വധശിക്ഷ നിരോധിക്കണമെന്ന് തത്വാധിഷ്ഠിതമായി വാദിച്ചുവരുന്ന പാര്‍ടിയാണ് സിപിഐ എം. നിരപരാധികളായ 257 പേരുടെ ജീവനപഹരിക്കുകയും നിരവധിപേര്‍ക്ക് പരിക്കേല്‍ക്കാന്‍ ഇടയാക്കുകയും ചെയ്ത ഹീനമായ ഭീകരാക്രമണമാണ് 1993ലെ മുംബൈ ബോംബ് സ്ഫോടനം. ഇതിനു പിന്നില്‍ പ്രവര്‍ത്തിച്ച ക്രിമിനലുകളെ നിയമത്തിന്റെ പിടിയില്‍ കൊണ്ടുവരേണ്ടത് അത്യാവശ്യമാണ്. കേസിലെ മുഖ്യപ്രതികള്‍ രാജ്യത്തിനു പുറത്തുള്ള ഏജന്‍സികളുടെ സഹായത്തോടെ രക്ഷപ്പെട്ടുവെന്നതിന് വ്യക്തമായ തെളിവുകളുണ്ട്. യാക്കൂബ് മേമന്‍ ഗൂഡാലോചനയില്‍ പങ്കാളിയായിരുന്നു. വിചാരണയ്ക്കായി തന്റെ കുടുംബത്തെ ഇന്ത്യയിലേക്ക് മടക്കിക്കൊണ്ടുവരാനും ഇയാള്‍ സന്നദ്ധനായി. ആക്രമണത്തിലും ഭീകരര്‍ക്ക് സംരക്ഷണം നല്‍കിയതിലും പാകിസ്ഥാന്‍ പൗരന്മാര്‍ക്കുള്ള പങ്കിനെക്കുറിച്ച് ഇന്ത്യന്‍ അധികൃതര്‍ക്ക് വിവരങ്ങള്‍ നല്‍കിയത് യാക്കൂബ് മേമനാണ്, അതുകൊണ്ട് സര്‍ക്കാരിന് ലഭ്യമായ ഏകസാക്ഷിയും ഇയാളാണ്. എന്നിട്ടും, മറ്റ് പ്രതികള്‍ പിടിയിലാകാതെ തുടരുമ്പോള്‍ യാക്കൂബ് മേമനു മാത്രം വധശിക്ഷ വിധിക്കപ്പെട്ടു-പിബി പ്രസ്താവനയില്‍ പറഞ്ഞു.