നടി ശില്‌പയുടെ മരണം, യുവാവിനുവേണ്ടി പൊലീസ് വ്യാപക അന്വേഷണം

ശില്‍പ്പയുടെ കൂട്ടുകാരിയും നര്‍ത്തകിയുമായ കാട്ടാക്കട സ്വദേശിനിയും കൂട്ടുകാരിയുടെ കാമുകനും ശില്‍പ്പയും ശില്‍പ്പയുടെ സുഹൃത്തായ യുവാവും കൂട്ടുകാരിയുടെ കാമുകന്റെ സഹോദരിയുടെ ബാലരാമപുരത്തെ വീട്ടില്‍ ഉച്ച വരെ ചെലവിട്ടിരുന്നതായി പൊലീസ് കണ്ടെത്തിയിട്ടുണ്ട്.

ഉച്ചയ്ക്കുശേഷം നാലു പേരും കൂടി കരമന മരുതൂര്‍ കടവിലെത്തി. നര്‍ത്തകിയായ കൂട്ടുകാരിയും കാമുകനും ശില്‍പ്പയും ശില്‍പ്പയുടെ സുഹൃത്തായ യുവാവും മറ്റൊരു ഭാഗത്തും ഏറെ നേരം ഒരുമിച്ചിരുന്നു സംസാരിച്ചു.

വൈകുന്നേരം നാലരയ്ക്ക് ശില്‍പ്പയ്ക്ക് മൊബൈല്‍ ഫോണ്‍ കൈമാറാന്‍ കൂട്ടുകാരി വന്നപ്പോള്‍ ശില്‍പ്പ കരയുന്നുണ്ടായിരുന്നുവെന്ന് കൂട്ടുകാരി പോലീസിനോട് മൊഴി നല്‍കിയിരുന്നു. തുടര്‍ന്ന് കുട്ടുകാരിയും കാമുകനും മടങ്ങി. ശില്‍പ്പയും സുഹൃത്തും കടവില്‍ പിന്നെയും സംസാരിച്ചുനിന്നു. ശില്‍പ്പയുടെ മൃതദേഹം കണ്ടെത്തിയ വിവരം രാത്രിയിലാണ് താനറിഞ്ഞതെന്നാണ് കൂട്ടുകാരി പൊലീസിനോട് പറഞ്ഞത്.

ശില്‍പ്പ ഡാന്‍സ് പ്രോഗ്രാമുകള്‍ക്കു പോകുമായിരുന്നു. സുഹൃത്തായ യുവാവിന് ഇതിഷ്ടമല്ലായിരുന്നു. ഇതിനെക്കുറിച്ചുള്ള തര്‍ക്കമാണ് വഴക്കില്‍ കലാശിച്ചതെന്നു പറയുന്നു.

ശില്‍പ്പയെ വീട്ടില്‍ നിന്ന് കൂട്ടിക്കൊണ്ടുപോയത് കുട്ടുകാരിയാണ്. ശില്‍പ്പ വരാന്‍ വൈകിയപ്പോള്‍ ഫോണില്‍ വീട്ടുകാര്‍ ബന്ധപ്പെട്ടപ്പോള്‍ കൂട്ടുകാരി പരസ്പര വിരുദ്ധമായാണ് സംസാരിച്ചതെന്നും ബന്ധുക്കള്‍ പറയുന്നു.