ഓണക്കാലത്ത് ഹോര്‍ട്ടികോര്‍പ്പ് പച്ചക്കറികള്‍ സംഭരിക്കും.

മറയൂര്‍ : ഓണക്കാലത്ത് മറയൂര്‍ മലനിരകളില്‍ വിളയുന്ന ശീതകാല പച്ചക്കറികളും ശര്‍ക്കരയും സംസ്ഥാന ഹോര്‍ട്ടികോര്‍പ്പ് പൂര്‍ണമായും സംഭരിക്കും. കാന്തല്ലൂര്‍, വട്ടവട, പെരൂമല, പുത്തൂര്‍ എന്നിവടങ്ങളിലെ കാബേജ്, കോളിഫ്ളവര്‍, ക്യാരറ്റ്, ഉരൂളക്കിഴങ്ങ് എന്നിവയും മറയൂരിലെ കര്‍ഷകര്‍ ഉല്‍പാദിപിക്കുന്ന ശര്‍ക്കരയുമാണ് സംഭരിക്കുന്നത്. ഇതിന് ഭാഗമായി ഹോര്‍ട്ടികോര്‍പ്പ് അധികൃതര്‍ കൃഷിയിടങ്ങള്‍ സന്ദര്‍ശിച്ചു. മറയൂര്‍ - കാന്തല്ലൂര്‍ എന്നിവടങ്ങളില്‍ കര്‍ഷകരുമായി അവര്‍ ചര്‍ച്ച നടത്തി. കഴിഞ്ഞ ഓണക്കാലത്ത് ഹോര്‍ട്ടികോര്‍പ്പ് പച്ചക്കറികള്‍ വേണ്ടത്ര ത്തത് വന്‍ വിവാദമായിരുന്നു. അന്ന് വില കുതിച്ചുയര്‍ന്നപ്പോള്‍ മറയൂരിലെ പച്ചക്കറികള്‍ തമിഴ്നാട്ടിലെ വിപണിയിലാണ് വിറ്റഴിച്ചത്. ഈ സാഹചര്യം ഒഴിവാക്കുന്നതിനാണ് അധികൃതര്‍ മറയൂരിലെത്തിയത്. ഹോര്‍ട്ടികോര്‍പ്പ് ചെയര്‍മാന്‍ ലാല്‍ വര്‍ഗീസ് കല്‍പകവാടി, മാനേജിങ്ങ് ഡയറക്ടര്‍ ഡോ. സുരേഷ്കുമാര്‍ എന്നിവരുടെ നേതൃത്വത്തില്‍ പ്രതിനിധി സംഘം കാന്തല്ലൂര്‍- മറയൂര്‍ പഞ്ചായത്തുകളിലെ കര്‍ഷകരുമായി സംസാരിച്ചു. കാന്തല്ലൂരില്‍ നിന്നും ഓണക്കാലത്ത് ദിവസേന 9 ടണ്‍ ഉരുളക്കിഴങ്ങ,് രണ്ട് ടന്‍ ക്യാരറ്റ്, മൂന്നര ടണ്‍ കാബേജ്, മൂന്ന് ടണ്‍ ബീന്‍സ് എന്നിവ വിപണിയില്‍ എത്തിക്കാന്‍ കഴിയുമെന്നാണ് കണക്ക്കൂട്ടുന്നത്. യൂക്കാലിപ്റ്റസ് മരങ്ങള്‍ പിഴുതുമാറ്റി പച്ചക്കറി കൃഷിചെയ്ത കര്‍ഷകരെയും കൃഷിയിടങ്ങളും പ്രതിനിധികള്‍ സന്ദര്‍ശിച്ചു. ഇവിടങ്ങളില്‍ മികച്ച വിളവാണ് ഉണ്ടായത്. 50 ഹെക്ടറോളം സ്ഥലത്താണ് ഇത്തരത്തില്‍ പുതുതായി കൃഷിയിറക്കിയത്. ഹെക്ടറിന് അന്‍പതിനായിരം രൂപയാണ് യൂക്കാലി പിഴുത് പച്ചക്കറി ക്യഷി ചെയ്യുന്ന കര്‍ഷകര്‍ക്ക് ഹോര്‍ട്ടി കോര്‍പ് നല്‍കുന്നത്. ഈ പദ്ധതി ഇനിയും വ്യാപിപ്പിക്കുമെന്ന് ചെയര്‍മാന്‍ ലാല്‍വര്‍ഗീസ് കല്‍പകവാടി പറഞ്ഞു. മുന്‍ കൃഷി അഡീഷണല്‍ ഡയറക്ടര്‍ എന്‍ വിജയന്‍, കേരള അഗ്രിക്കള്‍ച്ചറല്‍ യൂണിവേഴ്സിറ്റി പ്രൊഫ. അബ്ദുള്‍ വഹാബ്, പ്ലാനിങ്ങ് ബോര്‍ഡ് ഡെപ്യൂട്ടി ഡയറക്ടര്‍ രാജേന്ദ്രന്‍, ജെഡിഎ ഗീത, ഇടുക്കി ജില്ല അഗ്രിക്കള്‍ച്ചറല്‍ ഡെപ്യൂട്ടി ഡയറക്ടര്‍ ഉഷാകുമാരി എന്നിവരാണ് സംഘത്തിലുണ്ടായിരുന്നത്.