പണവും സ്വര്‍ണവും കവര്‍ന്നു

പന്തളം : പത്രലേഖകന്റെ വീട്ടില്‍ ആളില്ലാതിരുന്ന നേരത്ത് മോഷ്ടാക്കള്‍ പണവും സ്വര്‍ണവും കവര്‍ന്നു. തേജസ് പത്രത്തിന്റെ പന്തളം ലേഖകന്‍ കടയ്ക്കാട് ദാറില്‍നൂറ് വീട്ടില്‍ അബ്ദുള്‍ ജബാറിന്റെ വീട്ടില്‍ നിന്നാണ് 2,70,000 രൂപയും അരപവന്‍ സ്വര്‍ണവും കവര്‍ന്നത്. പന്തളം ജങ്ഷനില്‍ വൈഗ തുണിക്കട നടത്തി വന്നിരുന്ന ജബാറും ഭാര്യയും കടയിലായിരുന്ന സമയത്താണ് വ്യാഴാഴ്ച രാത്രി വീടിന്റെ ടെറസിലെ കതക് പൊളിച്ച് അകത്ത് കയറിയ മോഷ്ടാക്കള്‍ ബഡ് റൂമിലെ സ്റ്റീല്‍ അലമാരിയില്‍ വച്ചിരുന്ന സ്വര്‍ണവും പണവും മോഷ്ടിക്കുകയായിരുന്നു. ജബാറും ഭാര്യയും കടയടച്ച് രാത്രി 10ന് വീട്ടിലെത്തിയപ്പോഴാണ് മോഷണവിവരം അറിയുന്നത്. ഓണക്കച്ചവടത്തിന്റെ ആവശ്യത്തിനായി ഭാര്യയുടെ സ്വര്‍ണം പണയപ്പെടുത്തിയ പണമാണ് നഷ്ടപ്പെട്ടത്. പൊലീസില്‍ നല്‍കിയ പരാതിയെ തുടര്‍ന്ന് പന്തളം സിഐ സുരേഷ്കുമാറും വിരലടയാള വിദഗ്ധരും പരിശോധന നടത്തി.