ഡാളസ് ക്നാനായ കാത്തലിക് അസോസിയേഷൻ (കെ.സി.എ.ഡി.എഫ്.ഡബ്ല്യു) ഓണാഘോഷം വർണാഭമായി

ഡാളസ് : നോർത്ത് ടെക്സസിലെ ക്നാനായ സമൂഹത്തിന്റെ കൂട്ടായ്മയും പാരമ്പര്യവും ആഘോഷമാക്കിയ KCADFW ഓണം 2026 സെപ്റ്റംബർ 12-ന് ഡാളസിൽ വർണാഭമായി നടന്നു. പ്രസിഡന്റ് ബൈജു ആലപ്പാട്ടിന്റെ നേതൃത്വത്തിലുള്ള KCADFW എക്സിക്യൂട്ടീവ് കമ്മിറ്റിയുടെ നേതൃത്വത്തിൽ സംഘടിപ്പിച്ച ആഘോഷത്തിൽ നൂറുകണക്കിന് കുടുംബങ്ങൾ പങ്കെടുത്തു. ആഘോഷത്തിന്റെ പ്രധാന ആകർഷണമായ Talent Fest രാവിലെ 9 മണി മുതൽ വൈകിട്ട് 5:30 വരെ നടന്നു. എല്ലാ പ്രായക്കാരെയും ഉൾപ്പെടുത്തി 35-ലധികം ഇനങ്ങളിലായി ഏകദേശം 400 മത്സരാർത്ഥികൾ വിവിധ കലാപരിപാടികളിൽ മാറ്റുരച്ചു.

കുട്ടികൾ മുതൽ മുതിർന്നവർ വരെ ആവേശത്തോടെ പങ്കെടുത്ത Talent Fest, ക്നാനായ സമൂഹത്തിലെ കലാപ്രതിഭകൾക്ക് മികച്ച വേദിയായി. പരമ്പരാഗത ഓണാഘോഷത്തിന്റെ ഭാഗമായി മഹാബലി എഴുന്നള്ളിപ്പ്, ചെണ്ടമേളം, തിരുവാതിര, വിവിധ നൃത്ത-സംഗീത പരിപാടികൾ എന്നിവ അരങ്ങേറി. മാസങ്ങളോളം നീണ്ട പരിശീലനത്തിന്റെയും ഒരുക്കങ്ങളുടെയും ഫലമായ വിവിധ കലാപരിപാടികൾ കാണികളുടെ ശ്രദ്ധ നേടി. ആഘോഷത്തിന്റെ മറ്റൊരു പ്രധാന ആകർഷണമായിരുന്നു പരമ്പരാഗത ഓണസദ്യ. കേരളത്തിന്റെ തനത് രുചികളും പാരമ്പര്യ വിഭവങ്ങളും ഉൾപ്പെടുത്തി തയ്യാറാക്കിയ വിവിധ ഓണവിഭവങ്ങൾ അടങ്ങിയ സമൃദ്ധമായ സദ്യ വാഴയിലയിൽ വിളമ്പി. കുടുംബാംഗങ്ങളും അതിഥികളും ഒരുമിച്ചിരുന്ന് ഓണസദ്യ ആസ്വദിച്ചത് ആഘോഷത്തിന് കേരളീയ തനിമ നൽകി.

മലയാള സിനിമയിലെ പ്രമുഖ കോമഡി ആർട്ടിസ്റ്റ് ജോബി പാല മുഖ്യാതിഥി പ്രകടനത്തിലൂടെ ആഘോഷത്തിന് കൂടുതൽ ആവേശം പകർന്നു. KCADFW ഓണം ആഘോഷത്തിൽ ജോബി പാലയുടെ രണ്ടാമത്തെ സന്ദർശനം കൂടിയായിരുന്നു ഇത്. അദ്ദേഹത്തിന്റെ ഹാസ്യപരിപാടികൾ സദസ്സിൽ ചിരിയും ആവേശവും നിറച്ചു. കേരള അസോസിയേഷൻ ഓഫ് ഡാളസ് പ്രസിഡന്റ് ഷിജു എബ്രഹാം വിശിഷ്ടാതിഥിയായി പങ്കെടുത്തു. ഡാളസിലെ മലയാളി സമൂഹത്തിന്റെ കൂട്ടായ്മയും സൗഹൃദവും ശക്തിപ്പെടുത്തുന്നതിന്റെ പ്രാധാന്യം അദ്ദേഹം തന്റെ സന്ദേശത്തിൽ ചൂണ്ടിക്കാട്ടി. KCADFW Cultural Committeeയുടെ നേതൃത്വത്തിൽ മാസങ്ങളോളം നടത്തിയ തയ്യാറെടുപ്പുകളാണ് ആഘോഷത്തിന്റെ വിജയത്തിന് പ്രധാന കാരണം. Talent Fest ഉൾപ്പെടെയുള്ള പരിപാടികളുടെ ഏകോപനത്തിനായി കമ്മിറ്റി അംഗങ്ങളും വോളന്റിയർമാരും എക്സിക്യൂട്ടീവ് കമ്മിറ്റി അംഗങ്ങളും വലിയ പരിശ്രമമാണ് നടത്തിയത്. KCYL കുട്ടികൾ, കലാപരിപാടികളിൽ പങ്കെടുത്തവർ, രക്ഷിതാക്കൾ, മത്സരാർത്ഥികൾ, സന്നദ്ധ പ്രവർത്തകർ എന്നിവരുടെ കൂട്ടായ പ്രവർത്തനവും ആഘോഷത്തിന് മികവ് നൽകി.